Election candidates warned by Maoists

शिवराज योगी
धनगढी पुस २५
 राजाद्धारा घोषित नगर निर्वाचनमा उम्मेदवारी दिनेप्रति सशस्त्र व्रि्रोही माओवादीले कडा रबैया अपनाउने भएको छ। माओवादीका कैलाली जिल्ला इन्चार्ज अखण्डले नगर निर्वाचनमा नउठ्न आग्रह गर्दा अट्टेर गर्नेलाई नछोडिने जानकारी दिएका छन्। सुरुमा वारेन्ट जारी गर्ने, त्यसपछि राज्य विरुद्धको मुद्धा लगाउने, त्यतिगर्दा पनि नमाने 'जनसत्ता'मा हाजिर गराउने र त्यतिले पनि नपुगे कारबाहीका लागि पत्राचार गर्नेलगायतका कडा कारवाही गरिने जानकारी उनले दिए।
भौतिक कारबाही नगरिने भनिए पनि चौथो चरणका कारबाहीले पनि काम नगरे जे सुकै हुन सक्ने उनले बताए। माओवादीले सर्वसाधारणलाई कम्ब्याट ड्रेस नलगाउन उर्दी जारी गरेको छ। अहिले बजारमा देखिएको सैन्य पोशाकजस्तो लाग्ने कपडा नलगाउन आग्रह गरिएको छ।
जिल्ला इन्चार्ज अखण्डले संचारकर्मीहरुसँगको भेटमा राजनीतिक दलका कार्यकर्तालाई ढुक्क भएर गाँउमा बस्ने वातावरण बनाउन आफूहरु लागिपरेको बताए। 'दल-माओवादीबीचको सहमतीमा आँच आउन नदिन जस्तो सुकै त्याग गर्न तयार' रहेको उनले बताए। अखण्डका अनुसार, विगतमा कब्जा गरिएका राजनीतिक दलका नेता तथा कार्यकर्ताको जग्गा फिर्ता गरिनेछ। माओवादीले जिल्लामा अहिलेसम्म एक हजार ५ सय विघा जमिन कब्जामा लिएको छ।
स्वतन्त्र समाचार सेवा।